Cais am fesurydd dŵr

Information

Mae nifer fawr iawn o geisiadau am fesuryddion yn dod i law ar hyn o bryd, felly gallai hi gymryd mwy o amser nac arfer i ni ymateb. Os ydych chi wedi cyflwyno cais, gallwn gadarnhau ei fod e’n cael ei brosesu ac nid oes angen i chi gysylltu â ni eto. Cewch alwad gan rif 0330 pan fyddwn ni’n ceisio trefnu apwyntiad gyda chi.

Ymddiheurwn am unrhyw anghyfleustra.

Os ydych chi am gyflwyno cais am fesurydd, gallwch wneud hynny ar lein.

Symudedd yn newid: Rebecca Snell


3 Rhagfyr 2021

Rydyn ni i gyd wedi gweld newidiadau ers i ni fod yn y swyddfa ddiwethaf. I mi, y newid mwyaf yw fy symudedd. Cyn y cyfnod clo, byddwn i'n cerdded o gwmpas y swyddfa heb gymorth (er ychydig bach yn sigledig).

Pan awn ni nôl, rydych chi'n fwy tebygol o ngweld i'n cerdded â ffon, neu â ffrâm rholio, sydd fel ffrâm gerdded ar olwynion. Mae hynny oherwydd, fel popeth arall, gall symudedd rhywun newid, ac felly hefyd defnydd rhywun o gymhorthion symudedd.

Fe ddechreuais i ddefnyddio ffon gerdded ychydig flynyddoedd yn ôl, ar y cychwyn, byddwn i ond yn defnyddio’r ffon mewn sefyllfaoedd lle'r oeddwn i'n gwybod y byddai angen i mi gerdded tipyn. Dros amser, fe ddechreuais i ei defnyddio'n fwy ac yn fwy, ac yn y pen draw, yr unig le lle nad oeddwn i'n ei defnyddio oedd gartref.

Tua diwedd yr haf, pan ddechreuodd y glaw, fe sylweddolais i fy mod i'n mynd yn gyndyn i fynd allan am dro ar fy mhen fy hun am fod y llawr gwlyb yn teimlo fel iâ dan fy nhraed.

Roedd hi'n amser newid rhywbeth.

Gofynnodd therapi galwedigaethol i mi roi cynnig ar sawl peth gwahanol er mwyn cadw i symud yn ddiogel. Yn y pen draw fe ddewisais i'r ffrâm rholio. Rwy'n cofio meddwl: "pa mor aml welwch chi rywun o dan 70 oed â ffrâm gerdded?!" I mi, roedd ffon gerdded, baglau neu gadair olwyn oll i'w gweld yn fwy "derbyniol" fel cymhorthion cerdded i bobl iau, ond roedd ffrâm rolio ychydig yn fwy anarferol. Er fy mod i wedi bod yn defnyddio fy ffon gerdded am ychydig flynyddoedd, rwy'n dal i fod ychydig bach yn hunanymwybodol wrth ddefnyddio fy nghymhorthion.

Y tro cyntaf i mi fynd allan am dro gyda'r ffrâm rholio, fe eisteddais i yn y car am 10 munud yn trio magu'r hyder i fynd allan. Ond fe es i, a dydw i ddim wedi bod am dro ar fy mhen fy hun hebddi ers hynny. Mae ambell un yn edrych arna i’m syn, sy'n deimlad annifyr – ond ar yr ochr bositif, mae rhywun wedi stopio a gofyn i mi ble ges i’r ffrâm am eu bod nhw wedi cael trafferth ffeindio un addas eu hunain! Rwy'n dal i ddysgu i dderbyn y newidiadau, ac rwy'n pryderu am beth fydd ei angen arna'i yn y dyfodol, ond mae defnyddio'r ffrâm rholio wedi rhoi'r hyder i mi fynd allan ar fy mhen fy hun ac wedi caniatáu i mi barhau i wneud pethau'n annibynnol a bod yn "fi fy hun".

Weithiau mae pobl yn osgoi defnyddio cymhorthion symudedd, gan ei gweld hi fel ildio i’w anhwylder neu adael iddo "ennill".

Ond y gwir amdani yw bod cymhorthion symudedd yn gallu cyfoethogi bywyd rhywun, gan roi peth o'r rhyddid roedden nhw wedi ei golli nôl iddyn nhw. Mae ymadroddion fel "caeth i gadair olwyn" yn cael eu defnyddio'n aml i ddisgrifio pobl sy'n defnyddio cymhorthion symudedd, ond mae'r fath yna o iaith yn anghywir. Nid yw cymhorthion symudedd yn caethiwo rhywun - maen nhw’n rhoi'r rhyddid a'r annibyniaeth iddynt fyw eu bywydau fel y maen nhw'n dymuno. Y peth sy'n cyfyngu ar berson go iawn yw mynediad i le, a cham-ganfyddiadau pobl eraill yn y gymdeithas.

Gall anghenion person newid o ddydd i ddydd, ac mae gwahanol weithgareddau'n gofyn am wahanol fathau o gymorth. Cofiwch, nid oes parlys ar bawb sydd mewn cadair olwyn, ac nid ydych chi'n gweld gwyrth os gwelwch chi nhw'n codi ac yn symud o gwmpas! Maen nhw wedi pwyso a mesur beth y mae angen iddynt ei wneud y diwrnod hwnnw, ac maen nhw'n gwybod sut a phryd i ddibynnu ar eu cymhorthion symudedd i gyflawni hynny'n ddiogel.