Mynnwch becyn lagio am ddim y gaeaf hwn

Lle oer problemus un: Pibellau dŵr a thapiau yn yr awyr agored

Os oes gennych bibellau a thapiau yn yr awyr agored, lapiwch nhw â deunydd inswleiddio neu becyn lagio. Bydd hyn yn helpu i inswleiddio’r pibellau gan eu hatal rhag byrstio ac achosi difrod os bydd y tymheredd yn disgyn i’r rhewbwynt.

Os oes gennych bibell ddyfrio sy’n gysylltiedig â thap yn yr awyr agored, caewch y falf (a allai fod y tu fewn) a draenio’r tap a’r bibell. Bydd hyn yn atal difrod iddynt.

Gall tapiau sy’n diferu gynyddu’r risg o bibellau’n rhewi. Bydd atal y tap rhag diferu’n arbed litrau o ddŵr pob dydd hefyd, gan arbed ynni ac arian ar eich bil dŵr.

Lle oer problemus dau: Pibellau mewn mannau heb eu gwresogi, fel yr atig, y garej neu gypyrddau’r gegin.

Eto, mae hi’n bwysig eich bod chi’n lapio pibellau sydd mewn ardaloedd heb wres â deunydd inswleiddio neu becyn lagio.

Os oes gennych fesurydd dŵr ar y wal y tu allan i’ch cartref, sicrhewch fod y pibellau sy’n arwain i mewn ac allan ohono wedi eu hinswleiddio, ac nad oes bylchau rhyngddynt. Cofiwch sicrhau bod cist y mesurydd wedi ei phacio â deunydd inswleiddio a bod y drws ar gau yn dynn.

Dylech sicrhau eich bod chi’n gwybod ymhle mae’ch stoptap, a sicrhau ei fod yn gweithio hefyd. Bydd angen i chi fod yn gallu cyrraedd ato’n gyflym a gwybod sut i’w gau os bydd y gwaethaf yn digwydd.

Lle oer problemus tri: Adeiladau sy’n wag am ychydig ddiwrnodau, fel busnesau, ysgolion neu ail gartrefi.

Mae adeiladu gwag mewn mwy o berygl na’r lleill. Os ydych chi’n gadael eich cartref neu’ch busnes, caewch eich stoptap a draeniwch y system fel nad oes unrhyw ddŵr yn y system i rewi. Os ydych chi’n bwriadu bod oddi cartref am gyfnod byr, cadwch eich gwres ar lefel isel os oes modd er mwyn helpu i gadw eich cartref neu’ch busnes yn gynnes, ac atal y pibellau rhag rhewi.

A chofiwch am eich teulu, eich ffrindiau a’ch cymdogion hefyd. Efallai y bydd angen cymorth llaw arnynt i baratoi – a gallai fod yn syniad da trefnu’ch bod chi’n cadw llygad ar eich cartrefi’ch gilydd os ydych chi’n bwriadu mynd i ffwrdd.

Wyddech chi?

Bydd ein timau’n gweithio 24/7 er mwyn cadw pethau’n llifo. Boed rhew, llifogydd, eira neu eirlaw; beth bynnag a ddaw, mae ein timau’n barod i gynorthwyo ein cwsmeriaid a chadw eu dŵr yn llifo dros y gaeaf.

Dyma ambell i esiampl o sut mae timau ar draws Dŵr Cymru wedi bod yn paratoi.

• Mae ein tîm gwasanaethau dŵr wedi bod yn uwchraddio ein storfeydd o ddŵr potel ac yn sicrhau bod gennym ddigon o boteli i gynorthwyo cwsmeriaid os bydd tywydd eithafol yn achosi problemau annisgwyl gyda chyflenwadau.
• Mae ein tîm Cartref wedi bod yn brysur yn anfon pecynnau lagio am ddim at gwsmeriaid i’w cynorthwyo i baratoi eu cartrefi am y Nadolig ac osgoi byrst mewn pibellau os bydd hi’n rhewi.
• Mae ein tîm cymorth i gwsmeriaid yn cynorthwyo cwsmeriaid â’u biliau dŵr os yw’r cynnydd mewn costau byw yn achosi trafferthion iddynt, ynghyd â’r cwsmeriaid bregus hynny sydd angen ychydig bach yn fwy o help.
• Mae gan ein tîm colledion i fyny’r llif gerbydau 4x4 wrth law fel y gallant ymateb i ddigwyddiadau o ollyngiadau ar draws ein cymunedau, boed law neu hindda.

Sicrhewch fod eich cartref a’ch busnes chi’n barod am y gaeaf eleni.

Am ragor o gyngor a fideos i’ch tywys, neu i archebu pecyn lagio, ewch i gaeaf barod