Cais am fesurydd dŵr

Information

Mae nifer fawr iawn o geisiadau am fesuryddion yn dod i law ar hyn o bryd, felly gallai hi gymryd mwy o amser nac arfer i ni ymateb. Os ydych chi wedi cyflwyno cais, gallwn gadarnhau ei fod e’n cael ei brosesu ac nid oes angen i chi gysylltu â ni eto. Cewch alwad gan rif 0330 pan fyddwn ni’n ceisio trefnu apwyntiad gyda chi.

Ymddiheurwn am unrhyw anghyfleustra.

Os ydych chi am gyflwyno cais am fesurydd, gallwch wneud hynny ar lein.

Sut rydyn ni'n gweithio gyda phrifysgolion


3 Awst 2021

Yn ddiweddar, cadarnhawyd y bydd Cyfarwyddwr yr Amgylchedd, Tony Harrington, yn parhau fel athro anrhydeddus yn Ysgol Biowyddorau Prifysgol Caerdydd am 5 mlynedd pellach.

Fe siaradon ni â Tony am ei rôl a sut mae Dŵr Cymru'n gweithio gyda'r byd academaidd.

Beth mae eich rôl fel athro anrhydeddus ym Mhrifysgol Caerdydd yn ei olygu?

Rwy'n aelod o fwrdd Sefydliad Ymchwil Dŵr Prifysgol Caerdydd, ac yn cynghori ar sut i gynnal y sefydliad a blaenoriaethau ymchwil ac ati. Rwy'n chwarae rhan flaenllaw hefyd wrth ymgeisio am gyllid ar gyfer y brifysgol, er enghraifft gan Sefydliad Ymchwil y DU (UKRI), ac mae llawer o'r ceisiadau am gyllid yn cyd-fynd yn union â'n hanghenion ymchwil ni ein hunain.

Mae Sefydliad Ymchwil Dŵr Prifysgol Caerdydd yn gweithio mewn partneriaeth â phrifysgolion Caerfaddon, Bryste a Chaer-wysg yn bennaf yn rhan o Gynghrair Prifysgolion GW4. Gyda'i gilydd, adrannau dŵr y GW4 yw’r grŵp cryfaf o arbenigwyr dŵr rydw i'n gwybod amdanynt yn y DU. Mae'r GW4 wedi denu gwerth miliynau o gyllid ymchwil hyd yn hyn, ac mae'n cyflawni gwaith ymchwil â ffocws tynn ar y sector dŵr. Y peth y mae partneriaid diwydiannol fel fi'n ei ychwanegu at y brifysgol (rwy'n hoffi meddwl) yw ein bod ni'n gallu llywio'r gwaith ymchwil i fod â mwy o effaith ar y gymdeithas, a mwy o ddefnydd o ran ein busnes.

Rydyn ni'n elwa ar waith y GW4 ac yn cefnogi'r doethuriaethau y mae ein grŵp yn eu noddi, yn ogystal â phrosiectau ymchwil penodol sy'n aml yn ymwneud â'r amgylchedd naturiol yng Nghymru – ar bynciau fel creu cynefinoedd ac effaith amgylcheddol llygryddion.

Y gwir amdani yw bod gan waith GW4 y potensial i wneud gwir wahaniaeth i'n gwaith ni fel cwmni. Gallwn gael gwerth bendigedig i’n cwsmeriaid o'i waith ymchwil - sy'n cynnig gwerth gwell o lawer na phe baem ni'n comisiynu ein gwaith ymchwil ein hunain neu hyd yn oed gyda Chwmnïau Dŵr eraill. Gyda chydweithrediad cydweithwyr eraill yn y diwydiant dŵr a'n rheoleiddwyr, gallwn gyfuno ein hadnoddau er mwyn gwasgu pob un diferyn o werth o waith ymchwil y brifysgol.

Yn gyffredinol, sut mae Dŵr Cymru’n gweithio gyda phrifysgolion?

Rydyn ni’n gweithio mewn partneriaeth. Nid oes gennym ni'r un fath o arbenigedd mewn meysydd arbenigol ag sydd gan y prifysgolion. Trwy eu gweld nhw fel partneriaid a gweithio gyda nhw, gallwn fanteisio ar eu harbenigedd a gallan nhw fanteisio ar ein harbenigedd a'n profiad ymarferol ni, fel y gellir hwyluso'r gwaith ymchwil i fod o ddefnydd go iawn - a dwysáu ei effaith trwy hynny. Trwy gydweithio, gallwn helpu ein gilydd i wneud y gwaith ymchwil yn fwy gwerthfawr, ac yn haws ei gymhwyso a'i droi'n wybodaeth ddefnyddiol - er enghraifft i fwydo polisïau newydd y llywodraeth, cynnyrch newydd neu dechnoleg y gall y gymdeithas ehangach fanteisio arni.

Pa brosiectau ymchwil prifysgol mae Dŵr Cymru wedi bod yn rhan ohonynt yn ddiweddar?

Dyma ambell un rydyn ni wedi bod yn gweithio arnynt:

  • Prifysgolion Caerdydd a Bangor – yn 2020, fe gydweithion ni i fonitro Covid ym mhoblogaeth Cymru ar led
  • Prifysgol Bangor – darogan risgiau o lifogydd ac ansawdd dŵr ar sail peryglon amgylcheddol cyfunol gan ddefnyddio data am lawiad
  • Prifysgol Abertawe - gwaith ymchwil oedd yn edrych ar hyfywedd defnyddio Oson gronynnog wedi ei actifadu yn y fan a'r lle yn hytrach nag adfywiad thermol

Pa mor bwysig yw hi i Ddŵr Cymru ein bod ni'n gweithio gyda'r byd academaidd?

I mi mae'r gwaith yma'n hanfodol. Dwi ddim yn gweld sut y gallwn wireddu gweledigaeth ein cwmni heb fanteisio ar arbenigedd y byd academaidd. Mae Deddf Cenedlaethau'r Dyfodol yn dweud yn glir iawn y dylem gyd-ddatblygu a chyd-gynhyrchu yng Nghymru, sef yr union beth rydym yn ei wneud gyda'r Prifysgolion. I bob pwrpas, mae'r Ddeddf yn gofyn ein bod ni'n gweithio mewn partneriaeth ag eraill fel y gall pawb ddod â'u cryfderau eu hunain at y bwrdd er mwyn i ni i gyd lewyrchu. Mae'r byd academaidd yn rhan annatod o'r economi gwybodaeth ac er mwyn defnyddio’r wybodaeth yna i fynd i’r afael â'r newid yn yr hinsawdd, colli bioamrywiaeth, a rhai o'r sialensiau cymdeithasol sy'n wynebu Cymru, bydd angen i ni fanteisio ar eu doniau nhw, ac iddyn nhw fanteisio ar ein rhai ni.