Sylw i'n Gweithwyr... Dionne Ide

Ac er ei bod hi'n bwysig dathlu'r mis yma, mae amrywiaeth a chynhwysiant yn rhywbeth rydyn ni'n angerddol yn ei gylch gydol y flwyddyn. Croeso i'r ail yn ein cyfres o flogiau 'Sylw i'n Gweithwyr' lle'r ydyn ni'n cyflwyno rhai o'n cydweithwyr BAME+ sy'n gweithio y tu ôl i'r llenni i helpu i ddarparu ein gwasanaethau hanfodol ar eich cyfer 365 diwrnod o'r flwyddyn.

Dyma Dionne!

"Heia, Dionne ydw i a dwi'n gweithio yn y ganolfan gysylltu am filiau. Fe ymunais i â'r cwmni ar ôl colli fy swydd flaenorol yn sgil effeithiau Covid 19 ac rydw i wedi bod yn gweithio gyda Dŵr Cymru ers ychydig dros flwyddyn erbyn hyn.

"Y ganolfan gysylltu yw'r fan lle mae'r rhan fwyaf o gwsmeriaid yn troi’n gyntaf os ydyn nhw am drafod eu cyfrifon â ni. Mae ffocws mawr ar gwsmeriaid yn y rôl ac mae'n golygu siarad â llawer o wahanol gwsmeriaid Dŵr Cymru – sy’n cynnwys unigolion neu fusnesau, felly mae llawer o amrywiaeth.

"Mae rhai galwadau'n gallu bod yn anodd. Er enghraifft, efallai bod angen i mi siarad â chwsmer sy'n fregus neu sy'n wynebu anawsterau ariannol. Mater o sicrhau'r canlyniadau gorau ar gyfer ein cwsmeriaid yw hi, felly mae mynd at wraidd anghenion penodol y cwsmer yn ystod yr alwad yn rhan bwysig o'r swydd fel y gallwn gynnig atebion a dod o hyd i'r ffordd orau o'u cynorthwyo nhw.

“Mae hyn yn aml yn golygu cydweithio'n agos â thimau eraill ar draws y busnes, felly mae'n bwysig iawn bod â dealltwriaeth dda o'r holl wahanol adrannau a beth maen nhw'n ei wneud. Mae'r wybodaeth yna'n golygu y gallaf gyfeirio galwadau at adrannau eraill sy'n gallu darparu'r cymorth penodol sydd ei angen ar y cwsmer yn gyflym.

“Mae fy ngwaith yn gallu rhoi boddhad mawr i mi. Mae'n rhoi boddhad arbennig i mi os ydw i'n gallu dod o hyd i ateb sy'n helpu cwsmer. Ac wrth gwrs, mae hi'n braf pan fyddan nhw'n rhoi'r amser i ddiolch i mi hefyd! Rydw i wedi cael adborth bendigedig hyd yn hyn, ac mae'n hyfryd clywed eich bod chi wedi gallu helpu rhywun a gwneud gwahaniaeth go iawn iddyn nhw.

“Rwy'n mwynhau gweithio gyda fy nhîm ac rwy'n edrych ymlaen at ein cyfarfodydd tîm bob wythnos. Er bod llawer ohonom ni'n gweithio o bell, rydyn ni'n dal i ffeindio'r amser i ddod at ein gilydd a rhannu ein profiadau o ddydd i ddydd. Mae'n golygu ein bod ni'n cael cyfle i'n helpu ein gilydd ac i gynnig atebion i'r gwahanol sialensiau sy’n codi. Mae yna deimlad o agosatrwydd sy'n gysur mawr. Fel tîm, rydyn ni'n gefn da i'n gilydd ac yn ceisio helpu ein gilydd bob tro pan fo pethau'n anodd!"

"Rydyn ni'n gweithio'n galed dros ben i sicrhau ein bod ni'n gwneud y peth iawn ar gyfer ein cwsmeriaid bob tro, a bod y ganolfan gysylltu'n cyflawni ei dargedau. Nid ar chwarae bach mae gwneud hyn – yn wir, mae'n gallu bod yn ddigon o her am ei fod yn gofyn am gyflymdra a chywirdeb yn ogystal â sgiliau rheoli amser rhagorol ac ymroddiad. Ond rydw i wir yn mwynhau'r amrywiaeth sy'n dod yn sgil fy rôl – yn sicr, does byth diwrnod diflas wrth weithio yn Dŵr Cymru!"