Ein rôl hanfodol wrth gynllunio datblygiadau

Ers 2016, rydyn ni wedi bod yn Ymgynghorai Statudol yn y broses gynllunio yng Nghymru yn sgil cyflwyniad newidiadau deddfwriaethol a bennodd materion dŵr a charthffosiaeth fel ystyriaethau allweddol yn y broses ddatblygu newydd.

Ond beth mae hynny'n ei olygu? Wel, pan fo rhywun yn cyflwyno cais i adeiladu i’r awdurdod lleol, byddan nhw'n gofyn i ni beth ydyn ni'n ei feddwl ac a oes gan ein rhwydwaith cyfredol y capasiti i gynnal y datblygiad newydd. Byddwn ni'n ystyried yr effaith ffisegol ar ein rhwydweithiau hefyd, ac a yw'r cynigion yn effeithio ar ein gallu i gyrchu a chynnal ein systemau'n ddiogel. Er ein bod ni'n cyflwyno sylwadau am faterion dŵr a charthffosiaeth, mae hi’n werth nodi nad ni sy'n gyfrifol am benderfyniadau cynllunio yn y pendraw, cyfrifoldeb yr awdurdod lleol yw hynny.

Ein ffocws ni yw cydbwyso datblygiadau newydd a thwf yn ein hardal weithredol ag amddiffyn yr amgylchedd a'r gwasanaeth a ddarparwn ar gyfer ein cwsmeriaid cyfredol. Yma yn Dŵr Cymru, mae gennym lawer o dimau'n cydweithio i helpu ein datblygwyr i gysylltu â'n systemau'n ddiogel, boed yn breswyliwr yn cynllunio estyniad, neu'n gwmni tai mawr sy’n cynllunio adeiladu cannoedd o gartrefi ar safle penodol. Mae cysylltu cartrefi newydd yn ein helpu ni hefyd am ei fod yn cynyddu ffrydiau refeniw – gan ein galluogi i ledu cost gweithredu, cynnal a buddsoddi yn ein hasedau ar draws sylfaen ehangach o gwsmeriaid.

Eleni fe ymatebon ni i dros 7,300 o ymgynghoriadau ar geisiadau cynllunio yng Nghymru, o adeiladu un tŷ i safleoedd mawr a nifer o dai. Fe godon ni bryderon gyda 44 o'r rhain, sef cwta 0.6% o'r holl ymgynghoriadau. At hynny, trwy gydweithio bu modd goresgyn llawer o'r problemau a'r pryderon hyn trwy weithio gyda'r datblygwyr a'r awdurdodau lleol i ddod o hyd i atebion er mwyn sicrhau bod datblygiadau’n gallu digwydd heb gyfyngu ar ein gallu i ddarparu dŵr yfed diogel, a chludo dŵr gwastraff i ffwrdd yn ddiogel.

Nid yw hynny'n golygu nad ydym yn cydnabod y sialensiau sydd o'n blaenau ar hyn o bryd, gan gynnwys defnyddio pibellau gorlif storm – sy'n hanfodol i atal eiddo rhag dioddef llifogydd carthion mewnol mewn tywydd stormus – a lefelau ffosffadau mewn Ardaloedd Cadwraeth Arbennig afonol.

Rydyn ni'n cydnabod ein rôl bwysig a breintiedig wrth gynorthwyo ffyniant economaidd yng Nghymru a’r rhannau cyfagos o Loegr a wasanaethwn. Rydyn ni'n sicrhau ein bod ni'n buddsoddi tua miliwn o bunnoedd y dydd yn ein rhwydwaith, ac un rhan o hyn yw sicrhau ei fod yn ymatebol i dwf a datblygiad yn y dyfodol.

Rydyn ni'n gwybod hefyd fod cydweithio'n sail i'r broses gynllunio gyfan yn y pen-draw, am fod angen i ni gydweithio'n agos ag awdurdodau lleol, datblygwyr, sefydliadau amgylcheddol fel Cyfoeth Naturiol Cymru, ac yn bwysicach na dim, ein cwsmeriaid a'n cymunedau – a chynrychioli eu buddiannau'n deg.

Os ydych am siarad ag aelod o’n tîm am ddatblygiad newydd, cysylltwch â ni ar 08009172652, developer.services@dwrcymru.com neu ewch i'n gwefan yma i gael rhagor o wybodaeth.

Gan Owain George, Pennaeth Cynllunio Datblygiadau Dŵr Cymru.