Cartref: Arbed dŵr i arbed arian
2 Chwefror 2022
Mae tîm Cartref yn gweithio'n galed i helpu ein cwsmeriaid i arbed dŵr, ynni ac arian. Mae lleihau eich defnydd o ynni'n newyddion da i fwy na dim ond eich biliau. Mae'n allweddol i leihau eich ôl troed carbon hefyd. Er mwyn gwneud hyn, rydyn ni'n cynnig amrywiaeth o declynnau a dyfeisiau arbed ynni o safon uchel am ddim i'ch helpu chi i leihau’ch defnydd o ddŵr.
I archebu nwyddau am ddim, y cyfan sydd angen i chi ei wneud yw cofrestru ar gyfer ein cyfrifiannell Get Water Fit, lle gallwch greu dangosfwrdd personol a fydd yn dangos i chi sut ac ymhle rydych chi'n defnyddio dŵr yn eich cartref, a ffyrdd syml o wneud arbedion. Pan fyddwch wedi creu eich dangosfwrdd, cewch archebu nwyddau arbed dŵr sy'n addas at eich anghenion, a hynny am ddim.
Pa declynnau sydd ar gael?
Pennau cawod sy'n rheoleiddio'r llif ac amseryddion i'r gawod.
Trwy newid i ben cawod sy'n rheoleiddio'r llif, gallwch leihau'ch defnydd o ddŵr yn eich cawod cymaint ag 8 litr y funud heb gyfaddawdu pwysedd y dŵr. Gallwch ategu'r arbedion hyn trwy dreulio llai o amser yn y gawod, a gallai hynny ddim bod yn haws gyda'n hamserydd 4 munud i'r gawod. Gwyliwch y fideo yma i weld sut mae gosod y pen cawod newydd - mae'n gyflym ac yn rhwydd, ac nid oes angen unrhyw offer arbennig.
Awyryddion i’r Tapiau
Gallwch ychwanegu awyryddion at y rhan fwyaf o'r tapiau yn y cartref, a thrwy ychwanegu aer at y dŵr, gallant arbed cymaint â hanner eich defnydd o ddŵr. Wnewch chi ddim sylwi ar y gwahaniaeth chwaith! Gwyliwch y fideo yma i weld sut mae gosod eich awyrydd newydd.
Bagiau dadleoli dŵr a stribedi gollyngiadau
Gall tŷ bach sy'n gollwng wastraffu tua 200 litr o ddŵr mewn diwrnod, ond mae'n gallu bod yn anodd gwybod bod problem. Mae ein stribedi canfod gollyngiadau'n ffordd syml o weld a oes dŵr yn gollwng ai peidio. Os nad ydych chi'n siŵr a oes dŵr yn gollwng ai peidio, rhowch wybod i ni ac efallai y gallwn ni helpu. Ffordd rhwydd arall o arbed dŵr yn yr ystafell ymolchi yw defnyddio ein bagiau dadleoli dŵr. Gall y bagiau hwylus yma arbed hyd at 2 litr o ddŵr â phob fflysh. Gwyliwch y fideo yma i weld sut i osod y ddau.
Felly pam oedi?
Rydyn ni eisoes wedi cyflenwi ein cwsmeriaid â dros 9,000 o becynnau arbed dŵr – ac mae bron i 20,000 o declynnau wedi eu gosod mewn cartrefi a busnesau ar draws y wlad i gyd.
Ewch draw i'n Cyfrifiannell Ffitrwydd Dŵr ac atebwch ambell i gwestiwn syml am eich defnydd o ddŵr o ddydd i ddydd, a chewch archebu'r nwyddau uchod a chychwyn ar eich siwrnai arbed dŵr.